Aws and Khazraj

         Dard-o-ghum aur ranj-o-alam ki taareek(andheri) raat ab sahar-aashna (subah) hone waali hai ,Islam aur uske maanne waalo ki zor o shor se Haq ki sada buland karne ki intizaar ki muddat ab khatm hone waali hai. Woh waqt ab qareeb aa gaya hai ke Allah Rabbul Izzat Ne Apne Mehboob Jaleel-ul-Qadr Rasoolﷺ Ke Saath Fatah wa Nusrat ke jo waadey kiye the woh pure kiye jaaye ,Islam ki azmat ka Alam (jhanda, Flag) ab is shaan se lehraaya jaane waala hai ke koi aandhi , koi toofan us ko jhuka na sakein. Uske Alam-bardaaro ka Shams (sooraj) ab tulu (nikalna, rise) hone wala hai taakey zulm se pareshaan duniya ka gosha gosha Noor-e-Tauheed se damak uthe Ahl-e-Makka ko Jihaalat ki neend se bedaar karne ke liye👑Haadi-e-Ins-o-Jaan Syyedina RasoolAllahﷺ ne 13 saal ka taweel arsa raat din an-thak koshish farmaayi lekin kuchh khush-naseebo ke alawa kisi ko taufeeq naseeb na hui ke woh apne Haadi-e-Barhaq Syyedina RasoolAllahﷺ ki Pur-Khuloos dawat qubool kar le. Ayyam-e-Haj me Arab ke aksar Qabaail Makka-tul-Mukarrama Shareef me haazri ka sharf haasil karte the Nabi-e-Rahmatﷺ un mawaaqey par har Qabeela ko Islam ki dawat dete lekin un aqal ke andho ko bhi Noor-e-Haq Nazar na aaya, phir kayi saalon tak lagaataar mehnat ke bawajood Makka-tul-Mukarrama Shareef aur uske aas-paas me aabaad qabaail me Islam qubool karne ke aasaar kahi dikhaayi na diye to Allah Ta'ala ki Taa-eed wa Nusrat ne Madinatul Munawwarah Shareef jo ke Arab ke sabse mazboot aur Bahadur 2 Qabilo (Aws aur Khazraj) ka maskan tha jo ki Yaman ke Baadshaho ki aulad the unke dilon ko islam ki taraf maayel kar diya ,Unhone be-intehaa mohabbat aur ba-sadd Shauq Islam ko Dil-o-Jaan se Qubool kar liya.

Yeh 2 Qabile"👑Bani Aus aur👑Bani Khazraj" ke naam se mausoom the. Jinhe Huzoor ﷺ ne "👑 Ansarullah aur Ansar-ur-RasoolAllah (Ansar)👑" ke Mo-azzaz aur Ba-Waqaar Laqab se nawaza , Unhone bade khuloos aur bahaduri aur Mardaangi se us Deen-e-Islam ki taaeed wa nusrat ka Haq ada kar diya. Jisse sirf Jazeerah-e-Arab ki qismat hi nahi jaagi balki kaarwaan-e-insaaniyat ko apna khoya hua waqaar aur maqaam-e-rafee mil gaya, unke zarri wa jungi kaarnaamo aur aqal ko hairat me daalne waale khidmaat ne sabko hairat me daal diya, lihaza unka zikr karne se pahle unse (Aus wa Khazraj (Ansar) muta'arif(pehchaan, introduction) karwaana zaruri hai, taakey unki pehchaan ho jaaye , yeh kaun log the aur Jazeera-e-Arab (Middle East) ke qabaail me unka kya maqaam tha.

Allama Suhaili RadiAllaho Ta'ala Anho farmaate hai ke "Ansar(الأنصار)" jama (plural form) hai ,iska waahid (singular form) "Naasir(ناصر)" hai lekin yeh Jama (plural form) khilaaf-e-qayaas hai, Haa agar "Naasir (ناصر)" ka "alif(أ) hazaf (silent kar diya jaaye to phir fa'al ka jama af'aal ke wazan par qayaas ke mutaabiq hogi.

(Ar-Rauzul Anf , Jild-2, Page:- 183)

Yeh do Qabiley Zamana-e-Jahiliyat me "Al-Ansar" nahi kahlaate the ,jab unhone Islam Qubool kiya to baargaah-e-Ilaahi se unhe us Moazzaz laqab se nawaaza gaya.

Yeh do Qabiley "Aus aur Khazraj" ke naam se mausoom the ,Lughat me "Aws ka matlab *Atiya* hai aur Khazraj thandi hawa ko kahtey hai.

(Ar-Rauzul Anf , Jild-2, Page:- 182)

Imam Suhaili RadiAllaho Ta'ala Anho ne likha hai : Lughat me thandi hawa ko Khazraj kaha jata hai, ya khaas Junoob (South) ki Hawa ko Khazraj kahtey hai, Zahr (book) me hai ke "Shadeed Hawa"( toofani hawa, windstorm) ko Khazraj kahtey hai.

(subal al-huda, jild-3, page-231)

Imam Mohammad Bin Yousuf Saalihi ne Subul Al-Huda me inke Shajra-e-Nasab par tafseeli bahes ki hai, likhte hai :-

👑Aws wa 👑Khazraj dono bhai the ,Haarsa ke bete the , unki waalidah ka naam

 "👑Qayla" tha (isliye Ansar Bani Qayla ke naam se bhi Mashhoor hai)

 

 Shajra-e-Nasab Aws wa Khazraj (Ansar Family Tree):-

 👑Aws wa 👑Khazraj Abna'a (sons of)

  👑Haars'a Bin 👑Sa'alba Al-Inqa'a Bin 👑Amr'o Al-Muzaiiqiya'a Bin 👑Aamir Al-Ma'assama'a Bin 👑 Haarsa Al-Ghatreef Bin 👑 Imro' Al-Qais Al-Batreeq Bin 👑 Sa'alba Bahlool Bin 👑 Maazan Zaadass'safar Bin 👑 AZD Bin 👑 Ghaus Bin 👑Maalik Bin 👑 Zaid Bin 👑 Kahlan Bin 👑 Saba Bin 👑 Yashjab Bin 👑Ya'rob (The Ancestor of Kings) Bin 👑 QAHTAN Bin 👑Al-Hamisa'a Bin 👑 SYYEDINA WA MAULANA HAZRAT ISMAEEL ZABIHULLAH ALAIHISSALAM Bin 👑 SYYEDINA WA MAULANA HAZRAT IBRAAHIM KHALLILULLAH ALAIHISSALAM.

Aus Wa Khazraj (Ansar) ke ajdaad (ancestors, forefathers) ke naamo ke saath unke Shahi Alqabaat(Imperial titles) bhi hai jinki tashreeh (explaination) bhi zaruri hai

 👑Haars'a ke baap ka naam Sa'alba hai uska laqab Al-Inqa'a hai jiska matlab hai lambi gardan wala kyunki unki gardan lambi thi isliye us laqab (Al-Inqa'a) se mash'hoor huwe

 👑Sa'alba Al-Inqa'a ke baap ka naam hai Amr'o aur inka laqab tha "Muzaiiqiya'a" jiska matlab hai parah parah (tukde - tukde) karna ya tukde tukde kar dene wala hai aur Amr'o Al-Muzaiiqiya'a Yaman ke bahot bade Baadshah the aur har roz 2 martaba libaas tabdeel (change) karte the aur raat ke waqt un dono jodo (shahi libaas) ko parah-parah (tukde - tukde) kar dete the aur un shahi libaaso ko dobarah khud pahenna bhi unhe naa-gawaar tha aur yeh baat unhe na-pasand thi ki unka joda koi aur shakhs pahne👑

 👑 Amr'o Al-Muzaiiqiya'a ke baap ka naam Aamir hai jinka laqab (title) "Ma'assama'a" ya'ani baarish ka pani hai aur inke is laqab (Al-Ma'assama'a) ki wajah yeh hai ke jab Mulk (Yaman) me qahat (Eng- Famine, Urdu- khaane peene ki shadeed qillat) padta to yeh (Aamir Al-Ma'assama'a) apne Mahal ke khazaano ke darwaaze khol dete aur sara khazana Yaman ke logo ke saamne rakh dete taaki har shakhs apni zarurat ke mutaabiq waha se utha le👑

 👑Aamir Al-Ma'assama'a ke baap ka naam Haarsa hai aur unka laqab Ghatreef hai jiska matlab Sardar ya Bacha-e-Shaaheen (Shaheen ka bacha, Uqaab ka bacha,Parindo ke baadshah ka bacha)👑

 👑Haarsa Al-Ghatreef ke baap ka naam Imro' Al-Qais hai aur unka laqab (title) "Batreeq" hai jiska matlab Romi Lashkar (Roman Army) ke Sipah-Saalaar (Commander-in-Chief) ko (PATRIARCH) kahtey hai, Batreeq us parinde ko bhi kahtey hai jiski chaal me Ghuroor aur Nikhwat (ghamand ,pridefulness) ho👑

 👑Imro' Al-Qais Al-Batreeq ke baap ka naam 

 Sa'alba hai aur unka laqab(title) "Bahlool" hai jiska matlab Sardar hai aur unke waalid ka naam Maazan hai jinka laqab Zaadass'safar Bin AZD Bin Ghaus Bin Maalik Bin Zaid Bin Kahlan Bin Saba Bin Yashjab Bin Ya'rob (The Ancestor of Kings) Bin 👑 QAHTAN (Inhone hi sabse pahle Arabi me guftugu farmaayi thi) 

 (Ziaunnabi,Jild-2,Page-520; Subul Al-Huda,Jild-3, Page-231,232)

 

 Inke saare ke saare ajdaad Yaman ke Baadshah guzre, Qahtan inke Jadd-e-Aala (Great Grandfather) ka naam hai jinhone sabse pahle Arabi me baat ki thi aur Ilmul Ansaab ke Maahir Zubair bin Bakar ki raai yeh hai ki Qahtan bhi Syyedina Hazrat Ismaeel Alaihissalam ki Nasl-e-Mubarak se hai unka mukammal naam yeh hai Qahtan Bin Hamisa'a bin Ismaeel Alaihissalam Bin Syyedina Hazrat Ibraheem Alaihissalam,

 Syyedina Hazrat Abu Hurairah RadiAllaho Ta'ala Anho ke qaul se bhi iski taaeed hoti hai ke Aapne Hazrat Syyeda Haajrah RadiAllaho Ta'ala Anha (Hazrat Ibrahim Alaihissalam ki Biwi) ka zikr karte huwe Ansar ko kaha tha-

                " تِلکَ اُمُّکُم یاَ بَنیِ ماَءِالسَّماَءِ"

                "Aye Ma'assama'a ke beton! Yeh Hajrah tumhari Maa hai♥️"

 Abhi aapne dekha hoga ke "Ma'assama'a" Ansar ke ek Dada (great grandfather) Aamir ka laqab hai.

      ‌" قاَلَ الحاَفِظُ : وَھٰذَاھُوَالرَّاجِحُ‌‌ فیِ نَقدِی"

"Ya'ani meri tehqeeq ke mutaabiq yahi qaul raajih (sahih, behtar) hai ke Qahatniyo ke Jadd-e-Amjad (Great Grandfather) bhi Adnaaniyo ki tarah Syyedina Hazrat Ismaeel Alaihissalam hai"

 (Ziaunnabi,Jild-2,Page-520; Subul Al-Huda,Jild-3, Page-231,232)